Deri më tash u aplikua vetëm për produktet e naftës.
Por Qeveria shumë shpejt do të caktojë çmimet maksimale në treg edhe për produkte themelore ushqimore dhe joushqimore.
Kjo synohet të bëhet përmes projektligjit për mbrojtjen e furnizimit me produkte themelore në raste të destabilizimit në treg. Ky projektligj i cili të premten kaloi në qeveri u arsyetua nga ministrja Rozeta Hajdari.
“Komisioni ndërministror i formuar për këtë çështje ka bërë analizën e çmimeve themelore në treg, në bazë të këtij raporti është vërtetuar se marzha tregtare te artikujt bazik nuk është e njëjtë te të gjithë operatorët ekonomikë si dhe mungon baza ligjore që përcakton marzhën tregtare të çmimeve të artikujve”, ka thënë Hajdari.
Hap i radhës është që projektligji të miratohet në Kuvend dhe pas publikimit në Gazetën Zyrtare të hyj në fuqi.
Megjithatë ekonomistët konsiderojnë se ndërhyrja e Qeverisë në politikat e çmimeve mund të sjell pasoja.
Ish-ministri i Tregtisë dhe Industrisë, Ismet Mulaj thotë se për këtë duhet të formohet një rregullator i pavarur që vepron jashtë ndikimeve politike.
“Nëse ky projektligj përcakton që rregullatori që duhet të jetë një institucion i pavarur në rast që heton deformime të tregut, konkurrencë jolojale atëherë përmes vendimit të vet ndërhyn te këto çmime, jam pro dhe mund ta ndihmojë konsumatorin në KS”, ka thënë ai.
Teksa ekonomisti Muhamet Spahiu vlerëson se çmimi tavan për produkte të ndryshme mund t’i penalizojë bizneset dhe kjo të sjellë dëme të tjera.
“Vendosja e çmimeve tavan në ekonomi normalisht që mund të frenojë inflacionin por gjithsesi mund të shkaktojë çrregullime të tjera në tregun e lirë, sikur mungesa e mallrave esenciale – normalisht nëse bizneset nuk do të kenë fitim në mallrat të cilat është vendos çmimi tavan, normalisht që edhe nuk do t’i mbajnë”, është shprehur Spahiu.
Çmimet e konsumit kanë shënuar rritje të madhe kohëve të fundit teksa sipas Agjencisë së Statistikave të Kosovës, inflacioni në gusht ka arritur në 13 %.
Kronika e realizuar nga gazetari Gojart Jashari.
