Në njërën nga çantat është i vendosur një eksplozivë.
Përmes nuhatjes, ky qen i trajnuar është duke kërkuar vendin se ku ndodhet bomba.
Pas zbulimit pasoj edhe shpërblimi.
Ky është njëri nga improvizimet që u bë këtë të premten në Qendrën e Kërkim Shpëtimit të Forcës së Sigurisë së Kosovës në Pomozotin, Fushë Kosovë.
Largimi i viktimave nga vendet larta e nga uji ishin improvizimet që u bënë para ministrit të mbrojtjes, Ejup Maqedoncit, e krerëve te FSK.
Madje, para tyre u prezantuan edhe disa nga pajiset që posedon FSK.
Kërkesa për pajisje të reja ndaj Ministrit të Mbrojtjes patën këta ushtarë.
Pikërisht në këtë qendër të premten edhe përfunduan ushtrimet ndërkombëtare për kërkim-shpëtim urban të ekipit holandez.
Në ceremoninë e certifikimit të këtyre ushtarëve holandezë ishte pjesë edhe kryeministri i Kosovës, Albin Kurti, e zëvendësambasadori i Holandës, Roland Goldberg.
Kurti, gjatë fjalës së tij, u shpreh krenar për trajnimin e përfunduar.
“Përkushtimi i Kosovës për partneritet dhe vendosmëria jonë për të kontribuar në zgjidhjet e përbashkëta është thelbësore. Jam jashtëzakonisht krenar për aftësitë e klasit botëror që po ushqejmë këtu në Pomozatin. Këto aftësi janë jetike për kombin tonë dhe për partnerët tanë të shumtë, ndërsa përgatitemi për rolet që duhet të luajmë në arenën globale”, tha Kurti.
Ndërsa, zëvendës ambasadori i Holandës, Roland Goldberg, u shpreh falënderues për mikpritjen e ekipit holandez të kërkim-shpëtimit.
“Ju faleminderit për mirëkpritjen e juaj. Ky ushtrim është shumë i dobishëm për bashkëpunimin e mëtejmë në mes të dy vendeve, në ngritjen e kapaciteteve të të dyja palëve për ndërtimin e gatishmërisë për tu përgjigjur situatave emergjente”, tha Goldberg.
Qendra e Trajnimit për Kërkim-Shpëtim e FSK-së vitin e kaluar ka ofruar trajnime për afër 3 mijë persona, në mesin e të cilëve krahas shtetasve tanë edhe qindra partnerë tjerë të huaj nga Shqipëria, Britania e Madhe, Italia, Hungaria, Jordania, Malta, Maqedonia e Veriut, Irlanda e Veriut, Portugalia, Turqia, Holanda, etj.
