Ministri i Jashtëm egjiptian, Badr Abdelatty, deklaroi të martën se negociatat për një armëpushim në Gaza po shoqërohen me diskutime mbi krijimin e një mekanizmi që do të siguronte tërheqjen e plotë të forcave izraelite dhe garantimin e aksesit të pakufizuar për ndihmën humanitare.
Gjatë një konference për shtyp me homologun e tij slloven, Abdelatty shprehu optimizëm mbi rrjedhën e negociatave, duke theksuar: “është bërë përparim i konsiderueshëm”.
Ai shpreson që ky raund bisedimesh të sjellë fundin e luftës dhe të krizës humanitare në Gaza, citon Anadolu.
Bisedimet indirekte mes Izraelit dhe Hamasit nisën të hënën në qytetin Sharm el-Sheikh të Egjiptit, pranë Detit të Kuq.
Diskutimet po zhvillohen mbi bazën e një plani armëpushimi të propozuar nga Presidenti amerikan, Donald Trump.
Abdelatty theksoi se fokusi kryesor i këtyre bisedimeve është vendosja e një mekanizmi për të garantuar tërheqjen izraelite nga Rripi i Gazës dhe lejimin e ndihmave humanitare përmes kanaleve të Kombeve të Bashkuara.
Sipas tij, negociatat synojnë gjithashtu të forcojnë rrugën drejt një paqeje të drejtë, të bazuar në zgjidhjen me dy shtete dhe në bashkimin politik të Bregut Perëndimor me Rripin e Gazës.
Ministri egjiptian mirëpriti iniciativën e Presidentit Trump dhe kërkoi nisjen e një procesi politik mbi bazën e momentit aktual diplomatik, që do të çonte drejt krijimit të një shteti të pavarur palestinez në kufijtë e vitit 1967, me Jerusalemin Lindor si kryeqytet.
Presidenti Trump prezantoi më 29 shtator një plan me 20 pika, i cili përfshin lirimin e robërve izraelitë në këmbim të të burgosurve palestinezë, armëpushim, çarmatim të Hamasit dhe rindërtim të Gazës.
Hamasi ka shprehur gatishmëri për ta pranuar këtë plan në parim.
