Kosova u bë vendi i vetëm në rajon që ka marrëveshje për tregti të mallrave dhe shërbimeve.
E gjithë kjo pas nënshkrimit të Marrëveshjes së Tregtisë së Lirë me shtetet anëtare të EFTA-s.
E sa përfitojnë bizneset kosovare nga kjo marrëveshje, tregon Aleanca Kosovare e Bizneseve.
“Kjo do të ndikojë dukshëm në rritjen e eksporteve të bizneseve kosovare, dhe kjo do të ndikojë dukshëm edhe në performancat e Kosovës si shtet se po zë vend nëpër mekanizmat e ndryshëm ndërkombëtarë”, tha Agim Shahini nga AKB.
Prandaj Shahini ka një thirrje për institucionet.
“Përpos arritjes së nënshkrimit duhet respektimin e saj. Sepse në të kaluarën janë nënshkruar disa marrëveshje por nuk janë respektuar. Dhe kjo është tepër e rëndësishme sa që patëm probleme me CEFTA-n që ishte në pyetje a po përjashtohemi apo jo. Dhe nëse këtu prap nëse nuk i nënshtrohemi rregullave të tregtisë ndërkombëtare, atëherë Kosova edhe pse ka nënshkruar nuk mundet asnjëherë që të realizojë ndonjë përfitim nga ajo”, tha ai.
Por sipas ish ministrit të Tregtisë, Ismet Mulaj, jo të gjithë sektorët përfitojnë nga kjo marrëveshje.
“Në disa drejtime tjera natyrisht që ka lehtësira të mëdha. Kosovën e bën faktor ekonomik në këto vende por fatkeqësia është që në këtë marrëveshje për kompanitë të cilat prodhojnë produkte me origjinë shtazore në një mënyrë i ka paralizu që në start”, tha Mulaj.
Tutje, Mulaj tregon arsyet për këtë.
“BE-ja në një mënyrë e ka blloku Kosovën dhe Kosova nuk mundet me eksportu produkte të cilat kanë përmbajtje shtazore, pavarësisht ato produkte janë të rritura dmth janë prodhim autokton i Kosovës, ose të importuara nga vende të ndryshme të BE-së. Problem që ripërpunohen në Kosovë dhe eksportohen në vendet e BE-së”, tha ai.
Përmes kësaj marrëveshjeje, Kosovës i mundësohen shkëmbime ekonomike ndërmjet republikës sonë dhe Islandës, Lihtenshtajnit, Norvegjisë dhe Zvicrës.
