Edin Kolgeci është kryetar i ri i Federatës së Hendbollit të Kosovës.
Kolgeci e mori përkrahjen e plotë të delegatëve në Kuvendin Zgjedhor të FHK-së të mbajtur të enjten në Prishtinë.
Kolgeci është doktor, kurse ka drejtuar për kohë të gjatë klubin Prishtina. Është edhe ish-hendbollist.
Ai ishte kandidati i vetëm për postin e kryetarit.
Në tri mandatet e kaluara FHK-në e ka udhëhequr Eugen Saraçini.
Mandati i Kolgecit është katërvjeçar. Kolgeci ka falënderuar delegatët për besimin, ndërsa ka premtuar punë maksimale dhe bashkëpunim me të gjitha palët për rritjen e mëtejmë të hendbollit kosovar.
Nënkryetar u zgjodh Xhavit Morina, ndërsa anëtare të Bordit me votat e delegatëve u zgjodhën Fatmire Ferati e Vlora Jashari.
Pjesë e bordit të ri janë edhe Shemsa Sadiku, që përfaqëson komunitetet, Isak Osmani i Shoqatës së Gjyqtarëve dhe Faruk Shala i shoqatës së trajnerëve.
Presidenti Kolgeci e shfrytëzoi të drejtën statutore për zgjedhjen e tre anëtarëve të Bordit.
Anëtarë të tjerë të Bordit janë: Eugen Saraçini, Fisnik Salihu e Agon Haxhikadrija.
Në Kuvendin Zgjedhor ishin 36 prej 37 delegatëve.
Është mbajtur edhe Kuvendi i Punës.
Janë miratuar raporti i punës, raporti financiar dhe i auditimit, plani i punës dhe financiar për vitin 2025.
Janë miratuar edhe ndryshimet statutore, në përputhje me ligjin e ri për sport.
Është vendosur për themelimin e shoqatës së hendbollistëve, ashtu si kërkohet me ligjin e ri. Kryetari i shoqatës me automatizëm bëhet pjesë e bordit të FHK-së.
