Në tingujt e çiftelisë duket hareja e fundvitit.
Nuk mungojnë as fotografitë e fëmijëve pranë bredhit në sheshin ‘’Skënderbeu’’.
E shënimi i kësaj dite vërehet edhe në veshje të familjarëve.
Por për qytetarët e Kosovës, mesnata e sotme është festë e dyfishtë.
Përveç nisjes së një viti të ri, qytetarët e vendit do të mund të lëvizin lirshëm në secilin vend të Bashkimit Europian.
Kjo për shkak të liberalizimit të vizave, të cilën Kosova po e gëzon nga një janari.
“E kam në plan me shku në një vend të BE-së, masi të hiqen vizat. Edhe jam shumë i gëzueshëm e i kënaqur që na hoqën vizat më në fund”, thotë Arsim Murtezi, qytetar.
Prandaj në këtë ditë, nuk munguan urimet. E madje disa patën festë të trefishtë këtë 31 dhjetor.
“Vëllaun e kam në Zvicër, është lind në natën e vitit të ri, Bashkim Shala, ia uroj ditëlindjen edhe festën popullit shqiptar. Mirë bahet po kush ka del kush nuk ka rrin ku është. Veç ai që ka del, ai që s’ka rrin ku është, s’ka ku shkon. Mirë u ba që u ba liberalizimi i vizave, urime të gjithëve viti i ri, besoj që ka me qenë një vit i mbarë e i mirë”, shprehet Besim Shala, qytetar.
Në shaka e sipër, prind të shtyrë në moshë tregojnë se si e shohin vendin pas një janarit.
“Do pleq jesim ksajde, do plaka, me t’shti n’gjynah…”
E të tjerë japin këshilla për të rinjtë që duan të ikin jashtë kufijve te shtetit.
“Më të mira janë këtu 500 euro e përnatë vjen te shtëpia, te familja, atje s’mundesh me i nda qato pare sot. Është shtrenjti e madhe atje. E i kisha preferu të rinjtë mos me shku badihava me u end, unë di edhe njerëz që po kthehen shumë”, thotë qytetari Hasan Ramadani.
Nga mesnata e sotme, qytetarëve të Kosovës u hiqet regjimi i vizave.
E të drejtë për të udhëtuar pa viza në 26 vendet e zonës Schengen do të kenë të gjithë qytetarët e vendit, për 90 ditë gjatë një viti.
Kosovarët mund të qëndrojnë deri në 90 ditë në çdo periudhë 180-ditore brenda zonës Shengen.
Në njoftimin e autoriteteve të Kosovës thuhet që nëse udhëtoni disa herë, duhet të llogaritni me kujdes numrin e ditëve të qëndrimit tuaj, pasi periudha e përgjithshme e qëndrimit nuk duhet të tejkalojë totalin prej 90 ditësh brenda periudhës 180 ditore. Periudha e qëndrimit llogaritet nga data e parë e hyrjes në çdo zonë Shengen.
Pa viza u mundëson qytetarëve të Kosovës të udhëtojnë pa vizë për qëndrime të shkurtra në zonën Shengen, për shembull, si turist, për të vizituar miqtë ose familjen, për të marrë pjesë në ngjarje kulturore ose sportive, takime afariste, trajtim mjekësor, për programe arsimore afatshkurtra si seminare, konferenca, punëtori, shkolla verore dhe çdo aktivitet të ngjashëm.
