Autore: Jona Kelmendi
Me jelek të verdhë pune e mjetet e tij, Fadil Rexhepi shihet çdo ditë duke pastruar rrugët dhe hapësirat e fshatit.
E këtë detyrë ai e ka nisur para shtatë vitesh me mbështetje nga diaspora, ndërsa prej muajit mars të këtij viti paguhet nga Komuna e Gjilanit.
Fadil Rexhepi punën e nisi falë diasporës dhe e vazhdon me mbështetjen e bashkëfshatarëve.
“Këtë punë fal bashkëfshatarëve të mi dhe diasporës, unë e bëj që 7 vite. Unë çdo herë e kom dashtë pastërtinë edhe për këtë arsye jom aktivizu këtu. Falë shoqatës ata më kanë thirr edhe më kanë thanë për me hi këtu. Ka ditë që ka punë më shumë por ka edhe ditë që ka më pak kemi bashkëpunimin shumë të mirë me bashkëfshatarë edhe me të gjithë shkon në nivel pune”, shprehet Rexhepi.
Ai thotë se pastron fshatin pesë ditë në javë, pavarësisht shiut e borës.
“Unë pesë ditë i kom punë në javë, ku bjen shi, bjen borë, unë gjithherë jom aktiv, gjithherë jom në orar të punës prej orës 8:00 deri në ora 16:00 ku edhe e mbaroj punën. Ka vështirësi po gjithherë vështirësitë tejkalohen”, tregon Rexhepi.
Komente të mira për punën e tij ka edhe drejtori i shkollës “Esat Berisha” në Llashticë, Nehat Shabani. Sipas tij, puna e Rexhepit ka bërë që shumë persona të vetëdijësohen për rëndësinë e pastërtisë.
“E mirëmban fshatin, është një punëtor jashtëzakonisht i zellshëm, një punëtor i madh i cili vazhdimisht punon e ka orarin e caktuam në ditë pune, por nganjëherë nëse ka nevojë edhe jashtë orarit të punës ai na gjendet edhe punon, e mirëmban fshatin në atë mënyrë që ia kanë lakmi edhe dikush nga jashtë që vjen”, shprehet ai.
Fadil Rexhepi thotë se shoqata e bashkëfshatarëve të diasporës janë shtyllë e fortë që i ndihmon fshatit.
Ndërkaq, Rexhepi e sheh këtë fshat si më të pastrin, të paktën për Komunën e Gjilanit.
