Franca u ka bërë thirrje shtetasve të saj që ndodhen në Kosovë të tregojnë kujdes të shtuar gjatë së mërkurës, më 16 shtator, ditë kur pritet të shpallet aktgjykimi ndaj katër ish-drejtuesve të Ushtrisë Çlirimtare të Kosovës në Hagë.
Në një njoftim të publikuar nga Ministria e Jashtme e Francës, qytetarët francezë këshillohen të shmangin tubimet dhe udhëtimet jo të domosdoshme brenda qyteteve dhe në pjesë të tjera të Kosovës gjatë kësaj dite.
“Tubime – Thirrje për vigjilencë. Më 16 shtator, duke filluar nga ora 10:00, janë planifikuar tubime të mëdha politike në të gjitha qytetet e Kosovës. Shtetasit francezë këshillohen të qëndrojnë larg këtyre tubimeve. Ata duhet të shmangin udhëtimet jo të domosdoshme brenda qyteteve dhe në gjithë vendin deri në fund të ditës”, thuhet në njoftim.
Në njoftim nuk specifikohet arsyeja e tubimeve të paralajmëruara, ndërsa ato përkojnë me ditën kur pritet të shpallet aktgjykimi ndaj Hashim Thaçit, Kadri Veselit, Jakup Krasniqit dhe Rexhep Selimit në procesin gjyqësor në Hagë.
Një paralajmërim të ngjashëm kishte publikuar edhe Ambasada e Shteteve të Bashkuara të Amerikës në Kosovë, e cila u ka kërkuar shtetasve amerikanë të tregojnë kujdes dhe të qëndrojnë larg tubimeve të mundshme./teve1.info/
