Kryetari i AAK-së, Ramush Haradinaj ka refuzuar ftesën e kryeministrit, Albin Kurti për një takim më 13 maj.
Ai tha se sa i përket temës së kësaj darke, kjo bie në përgjegjësinë e shefave të Grupeve Parlamentare.
“Besnik Tahiri, i cili udhëheq grupin tonë parlamentar dhe kolegë të tjerë, jam i bindur se do të diskutojnë në frymën kolegiale dhe do të gjejnë një gjuhë që pastaj do të përçohet në Kuvend nga grupet tona parlamentare për zbatim. Konsideroj se kjo temë bie drejtpërdrejtë në përgjegjësinë dhe në dijen e tyre”, ka shkruar Haradinaj.
Ai shtoi se nëse ka ndonjë temë tjetër që lidhet me momentumin politik, atëherë çështjen mund ta trajtojnë në kohë tjetër.
Ftesën e Kurtit e ka refuzuar edhe LDK-ja, kurse PDK ka pranuar ftesën e kryeministrit.
Kurti i ka ftuar për të hënën në një darkë pune liderët e tri partive parlamentare opozitare, Partisë Demokratike të Kosovës, Lidhjes Demokratike të Kosovës dhe Aleancës për Ardhmërinë e Kosovës për të diskutuar rreth përmbushjes së agjendës legjislative për sezonin pranveror.
