Me depërtimin e frontit të ftohtë, të shtunën parashikohet që gjatë orëve të para të 24-orëshit e deri në mëngjes të ketë reshje bore me intensitet të ndryshueshëm në të gjithë territorin e Kosovës, ku priten edhe shtresa, ndonëse jo të mëdha.
Lokalisht reshjet do të jenë më të dendura, sidomos në Rrafshin e Dukagjinit.
Pra, herët në mëngjes reshjet do të ndërpriten, ndërsa orët vijuese do të karakterizohen me vranësira dhe intervale me diell, ndërsa gjatë ditës mot kryesisht me diell në pjesën më të madhe të vendit.
“Era do të fryjë drejtimesh të ndryshme por më dominues nga drejtimi i veriut, e cila kohë pas kohe pritet të jetë e fuqishme, sidomos gjatë orëve të para të së shtunës, me shpejtësi prej 10-40 km/h”, thuhet në njoftimin e Meteo Kosova.
Temperaturat do të pësojnë ulje të theksueshme, me minimale që do të lëvizin prej -5 deri në -1°C, ndërsa maksimalet prej -1 deri në 2°C. Në mbrëmje, për shkak të kthjellimeve, pritet depërtim më i lehtë i ajrit të ftohtë, duke çuar në ulje të mëtejshme të temperaturave, sidomos gjatë natës, deri në -10°C.
