Gjykata Themelore në Gjakovë ka shpallur aktgjykim dënues ndaj të pandehurit me inicialet M.D., i cili është shpallur fajtor për tri vepra penale: “Dhuna në familje”, “Mospërfillja e gjykatës” dhe “Lëndimi i lehtë trupor”.
Pas përfundimit të shqyrtimit gjyqësor, gjyqtarja Blerina Kurtaj i ka shqiptuar të pandehurit dënim unik prej një viti e tre muaj burgim, si dhe 500 euro gjobë.
Sipas aktgjykimit, M.D. akuzohet se në shtëpinë e përbashkët në fshatin Novosellë e Epërme në Gjakovë, pavarësisht një urdhri për mbrojtje, ka ushtruar dhunë ndaj nënës së tij, R.D.
Sipas gjykatës, pas një mosmarrëveshjeje, ai e ka ofenduar dhe shqetësuar emocionalisht viktimën, ndërsa më 17 shkurt 2026, pas një konflikti tjetër, e ka goditur me shuplaka, e ka shtyrë dhe rrëzuar mbi tavolinë, duke i shkaktuar lëndim në dorën e majtë.
Tutje, sipas aktgjykimit, i pandehuri e ka goditur viktimën edhe me shkelm dhe e ka kanosur me një hekur që përdoret për ndezjen e prushit.
Ndryshe, Në dënim do t’i llogaritet edhe koha e kaluar në paraburgim, duke filluar nga 17 shkurti 2026./teve1.info/
