Me pranga në duar e sollën në Gjykatën Themelore në Prishtinë.
Zyrtarit të qeverisë së Serbisë, Igor Popoviq, i doli punë me drejtësinë kosovare, pas një fjalimi të mbajtur Rahovec, në të cilin përdori gjuhë të rëndë kundër Ushtrisë Çlirimtare të Kosovës.
UÇK-në, Popoviq e quajti organizatë terroriste.
“Kjo është sikur të përpiqesh të mbash një fjalim në Jeruzalem, aty ku ka vuajtur Krishti. Vëllezërit tanë kanë vuajtur sepse terroristët e UÇK-së nuk i donin serbët në këto anë, dhe me ekzekutimin e tyre donin të frikësonin popullsinë tjetër serbe, në mënyrë që të largohej nga ky rajon”, kishte thënë ai.
Në këtë fjalim, Popoviq bëri edhe një krahasim të UÇK-së, me krimet të cilat po i kryejnë forcat izraelite në Gaza.
“Dhemb edhe fakti që terroristët dhe organizatorët, ekzekutuesit e krimeve, nuk janë gjetur dhe ndëshkuar gjithë këto vite, megjithëse shohim që për një krim të ngjashëm – rrëmbimin e civilëve izraelitë – shkatërrohet e gjithë Gaza. Përkundër të gjitha grupeve ndërkombëtare hetimore të UNMIK-ut, EULEX-it dhe Tribunalit të Hagës, nuk ka të gjykuar e të ndëshkuar, përkundrazi, UÇK ende konsiderohet si organizatë çlirimtare dhe luftëtare për liri”, ishte shprehur zyrtari serb.
Me t’u bërë publik ky fjalim, Popoviq u ndalua nga Policia e Kosovës në pikën kufitare në Bërnjak, duke ia pamundësuar atij shkuarjen në Serbi.
Prokuroria Speciale ka kërkuar që Popoviqit t’i caktohet masa e paraburgimit prej 30 ditësh.
Seanca që nisi pasditen e së dielës, zgjati rreth një orë e gjysmë.
