Një grua ka pësuar lëndime trupore pasi ish-bashkëshorti e ka goditur veturën e saj derisa të dy ishin në lëvizje.
Zëdhënësi i Policisë për rajonin e Ferizajit, Kanun Veseli për tëvë1.info ka bërë të ditur se rasti ka ndodhur hënën pas mesnate në sheshin “Adem Jashari” në Ferizaj.
Veseli po ashtu ka bërë të ditur se viktima pas tretmanit mjekësor fillestar në Ferizaj është dërguar për trajtim të mëtejshëm në QKUK në Prishtinë.
Ndihmë mjekësore sipas Veselit i është ofruar edhe të dyshuarit i cili me vendim të prokurorit pas intervistimit është ndaluar për 48 orë.
“Më datë 17.02.2025, rreth orës 01:30, i dyshuari Sh. R(M/K) 31 vjeç, duke drejtuar automjetin e tij, kishte ndjekur viktimën (ish-bashkëshorten), e cila po ashtu ishte me veturë. Kur kanë arritur në Ferizaj, te Sheshi “Adem Jashari”, i dyshuari e ka goditur automjetin e viktimës, ndërsa të dy ishin në lëvizje. Si pasojë, viktima ka pësuar lëndime trupore. Pas tretmanit mjekësor fillestar në Ferizaj ajo është dërguar për trajtim të mëtejshëm në QKUK – Prishtinë. Për pasojë, në të dy automjetet janë shkaktuar dëme materiale. Hetuesit dhe krimteknikët kanë dalë në vendin e ngjarjes për ekzaminimin e automjeteve dhe ato janë larguar nga vendi i ngjarjes. Lidhur me rastin, është kontaktuar prokurori kujdestar, i cili ka udhëzuar që rasti të cilësohet si “Lëndim i rëndë trupor” dhe “Asgjësimi apo dëmtimi i pasurisë”. Pas intervistimit, me vendim të prokurorit të shtetit, i dyshuari është ndaluar për 48 orë, ndërsa ndihmë mjekësore ju ka ofruar edhe të dyshuarit”, ka thënë Veseli./teve1.info/
