Adem Ademi nga Mitrovica është njëri nga 1,584 personat që ende figurojnë të zhdukur si pasojë e luftës në Kosovë.
Lutfije Vokshi jeton me shpresën se një ditë do ta takojë sërish vëllanë e saj.
Me lot në sy, ajo thotë se të gjallë ia morën dhe të gjallë pret t’ia kthejnë Ademin.
“Shpresat e mia janë se e kanë marrë të gjallë dhe të gjallë duhet ta kthejnë. Çdo ditë jetojmë me ankth duke pritur një lajm për më të dashurin tonë. Kemi nevojë ta kemi shpirtin rehat me një përgjigje”, u shpreh Lutfije Vokshi.
Ajo tregon se që nga 19 prilli i vitit 1999 nuk dihet asgjë për fatin e vëllait.
“Më 19 prill vëllai është zhdukur dhe që atëherë nuk dimë asgjë për fatin e tij. Ai ka qenë i 23-ti në grup dhe për asnjërin prej tyre nuk dihet asgjë. Ishin grupi i doktorit Adem Ademi dhe grupi i intelektualëve të Mitrovicës”.
Vokshi kërkon më shumë angazhim nga institucionet vendore dhe ndërkombëtare për të ushtruar trysni mbi Serbinë që të zbulojë vendndodhjen e trupave të shumë personave të zhdukur.
“Institucionet vendore dhe ndërkombëtare duhet të angazhohen më shumë për këtë çështje duke bërë presion mbi Serbinë. Nuk është mirë që çështja e të pagjeturve të politizohet”.
Kosova ka kryer gërmime në lokacione të ndryshme ku dyshohet se gjenden mbetje mortore të personave të vrarë gjatë luftës, ndërsa në Serbi, tash e një kohë të gjatë, nuk janë bërë gërmime, duke mos e trajtuar me prioritet çështjen e të pagjeturve.
