Kalimi i Edon Zhegrovës te Juventusi është cilësuar si një moment historik për futbollin kosovar. Për ish-portierin Samir Ujkani, aktualisht drejtor sportiv i përfaqësueses së Kosovës, ky transferim nuk është thjesht një lëvizje merkatoje, por një fitore e madhe për gjithë vendin dhe për futbollin kombëtar.
Ujkani, i cili ka kaluar një karrierë të gjatë në Itali me skuadra si Palermo, Torino, Genoa dhe Empoli, e njeh mirë presionin dhe madhështinë e Serie A. Në një intervistë për mediat italiane, ai theksoi se Zhegrova është gati për këtë sfidë të madhe:
“Është një profil i veçantë, një lojtar që mund të ndryshojë fatin e një skuadre dhe ta drejtojë një sezon. Tani që është në formë, jam i bindur se do të befasojë gjithë Italinë. Te Lille ka treguar maturi dhe profesionalizëm, ndërsa tani Juventusi është një kapitull krejt tjetër në karrierën e tij.”
Për Ujkanin, zgjedhja e Zhegrovës për bardhezinjtë shkon përtej karrierës individuale:
“Kjo është një fitore për Kosovën. Po flasim për një komb që, pavarësisht vështirësive, po nxjerr gjithnjë e më shumë futbollistë të nivelit evropian. Zhegrova do të përfaqësojë jo vetëm veten, por edhe një gjeneratë të tërë që po rritet me ëndrrën e futbollit të madh.”
Përveç Juventusit, interes për Zhegrovën kishin shfaqur edhe Real Madrid e Barcelona, gjë që tregon qartë nivelin që ka arritur sulmuesi i Kosovës. Megjithatë, sipas Ujkanit, vendimi për t’iu bashkuar bardhezinjve është i duhuri:
“Juventusi është ambienti ideal për të. Do të ketë mundësinë të mësojë dhe të rritet akoma më shumë, duke u bërë një lojtar kyç në futbollin italian dhe evropian.”
Transferimi i Zhegrovës shihet si një tronditje pozitive për futbollin kosovar dhe një dëshmi se talentet e lindura në këtë vend po bëhen gjithnjë e më shumë pjesë e elitës së futbollit botëror.
