Kandidati i Lëvizjes Vetëvendosje për kryetar të Komunës së Vushtrrisë, Sylejman Meholli, ka konfirmuar publikisht se ka nënshkruar një marrëveshje koalicioni me kryetarin e Degës së LDK-së në Vushtrri, Xhafer Tahiri. Sipas tij, kjo marrëveshje do të jetë themeli për një qeverisje të përbashkët lokale për katër vitet e ardhshme.
Në emisionin “Info Nata” në Tëvë1, Meholli u shpreh:
“Unë jam shumë i lumtur sot që bashkë me LDK-në në degën e Vushtrrisë dhe me kryetarin Xhafer Tahiri kemi arritur një marrëveshje bashkëpunimi, një koalicion për qeverisje të përbashkët për katër vitet e ardhshme.”
Ai shtoi se marrëveshja është rezultat i një vullneti të përbashkët për ndryshim në qytetin e Vushtrrisë:
“Kjo ka ardhur si rezultat i vullnetit të dy subjekteve që ndajnë bindjen se Vushtrria ka nevojë për ndryshim – dhe këtë ndryshim do ta sjellim bashkë. Ashtu siç e bëmë ndryshimin në vitin 2017, do ta bëjmë sërish më 9 nëntor.”
Meholli po ashtu theksoi se marrëveshja është ndërtuar mbi bashkërendimin programor mes VV-së dhe LDK-së lokale:
“Jemi pajtuar që pikat e përbashkëta të programeve tona politike të bashkohen në një plan të unifikuar qeverisës për katër vitet e ardhshme.”
Në deklaratën e tij, Meholli zbuloi edhe përfshirjen e Kryeministrit Albin Kurti në këtë proces:
“Kemi pasur koordinim të plotë me kryeministrin. E kemi edhe mbështetjen e tij të plotë për zgjedhjet e 9 nëntorit. Jam shumë mirënjohës dhe falënderues sepse kjo ka qenë një mbështetje e jashtëzakonshme për këtë marrëveshje.”
Ai bëri të ditur se takimet për marrëveshjen janë mbajtur së fundmi dhe kanë përfshirë edhe Kurtin dhe Tahirin.
“Kanë ndodhur disa takime ditët e fundit, ku kemi qenë bashkë me Kryeministrin Kurti dhe me z. Tahiri, dhe marrëveshja është finalizuar.”
Strukturat qendrore të LDK-së kanë konfirmuar për media të ndryshme se nuk kanë qenë të informuar për këtë koalicion, duke e cilësuar atë si një vendim të njëanshëm të Degës së Vushtrrisë.
Kjo marrëveshja është nënshkruar pa miratimin e Kryesisë qendrore të partisë, dhe kjo ka shkaktuar pakënaqësi dhe reagime të brendshme, sidomos për shkak të afrimit me Lëvizjen Vetëvendosje, një subjekt që në nivel qendror ka pasur mospajtime të forta me LDK-në.
