Një zyrtar policor është ndër katër personat e ndaluar nga Inspektorati Policor i Kosovës (IPK) dhe Policia e Kosovës, nën dyshimin për përfshirje në një rast rrëmbimi që kishte ndodhur më 19 shtator 2025 në lagjen Veternik të Prishtinës.
Sipas njoftimit të IPK-së, arrestimi i të dyshuarve është rezultat i veprimeve intensive hetimore të ndërmarra në bashkëpunim me hetuesit e Policisë së Kosovës. Gjatë operacionit hetimor janë sekuestruar një armë zjarri dhe një lodër që imiton një armë automatike të tipit AK-47.
“Pas veprimeve të koordinuara hetimore, është siguruar prezenca e të dyshuarve dhe janë ndërmarrë të gjitha veprimet ligjore të parapara për ndriçimin e rastit,” thuhet në njoftimin zyrtar të IPK-së.
Prokuroria Themelore në Prishtinë ka caktuar masën e ndalimit prej 48 orësh për katër të dyshuarit, ndërsa IPK ka rekomanduar suspendimin e zyrtarit policor, si pjesë e procedurave të rregullta administrative.
“Hetimet po vazhdojnë në bashkëpunim të ngushtë me Policinë e Kosovës dhe Prokurorinë kompetente, me qëllim të zbardhjes së plotë të këtij rasti,” thuhet më tej në komunikatë.
Me ndalimet e fundit, numri i përgjithshëm i personave të arrestuar në lidhje me këtë rast ka arritur në tetë.
