Mbi 30 orë pasi u dorëzua në polici, u paraqit në gjykatore.
E në këtë sallë, xhudisti kosovar Akil Gjakova, u përball me dyshimet për dhunë në familje.
Seanca për media ishte e mbyllur. Madje, para dyerve të sallës në Gjykatën Themelore në Pejë, u panë edhe zyrtarë të Policisë së Kosovës.
Pas përfundimit të seancës që zgjati më shumë se 90 minuta, avokati Azdren Mekaj, tha se e kanë kundërshtuar kërkesën e prokurorisë.
“Kemi kundërshtuar kërkesën për caktimin e paraburgimit, me qenë se kemi të bëjmë me një rast të dhunës në familje, nuk mund të jap ma shumë detaje në lidhje me këtë rast”, tha Mekaj.
Gjatë kohës që Mekaj fliste për gazetarët, xhudisti kosovar, Akil Gjakova u largua nga daljet emergjente të objektit.
Gjykata Themelore e Pejës ende nuk ka marrë vendim.
“Sot nuk pritet të merret vendimi. Të pandehurit i është zgjatë masa e ndalimit edhe për 48 orë, brenda këtij afati gjykata do të nxjerrë vendim”, tha Tringa Zhuti, zëdhënëse e Gjykatës Themelore në Pejë.
Përpara se të dorëzohej në polici, xhudisti Akil Gjakova, ishte shpallur në kërkim nga Policia e Kosovës. Vetëm disa orë më pas, të martën në mbrëmje u vetëdorëzua në polici.
