Gjykata Themelore në Gjakovë ka shpallur aktgjykimin ndaj të pandehurit S.K., i cili është dënuar me dy vjet burgim dhe 1 mijë euro gjobë pasi u shpall fajtor për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Në njoftimin e gjykatës thuhet se rasti ka ndodhur më 14 korrik 2025, në qytetin e Gjakovës, kur i pandehuri është kapur në flagrancë duke shitur substanca narkotike.
“Në aktakuzë thuhet se i pandehuri, më datën 14 korrik 2025, në Gjakovë, pa autorizim, ka shitur substanca apo preparate të cilat me ligj janë shpallur si narkotikë, substanca psikotrope ose analoge. Hetuesit e DHTN-së kanë vërejtur të pandehurin tek i cili, në një moment, është afruar blerësi E.V., dhe në momentin kritik i pandehuri i ka dorëzuar këtij të fundit një qese me substancë narkotike në këmbim të shumës prej pesë (5) eurosh,” – thuhet në komunikatën e Gjykatës Themelore në Gjakovë.
Pas arrestimit, policia ka kryer kontroll në banesën e të pandehurit, ku janë gjetur dhe sekuestruar 19 qese me marihuanë, 8 qese me kokainë, si dhe një fishek kalibri 9×19 mm.
“Pas ekzaminimit nga Agjencia e Kriminalistikës dhe Forenzikës (AKF), është konstatuar se bëhet fjalë për substanca narkotike të llojit marihuanë me peshë 14.09 gramë dhe kokainë me peshë 2.86 gramë,” – thuhet më tej në njoftim.
Sipas vendimit të gjykatës, dënimi përfshin burgim efektiv prej dy vjetësh dhe gjobë në shumë prej 1,000 euro, të cilën i dënuari duhet ta paguajë brenda afatit ligjor.
