Dy vajza janë raportuar të zhdukur brenda 24 orëve të fundit në dy raste të ndara në Gjakovë dhe Rahovec.
Në lagjen Brekoc të Gjakovës, një qytetar ka njoftuar policinë se motra e tij, e cila ka të meta mendore, është larguar nga shtëpia dhe nuk dihet ku ndodhet. Sipas raportit policor, ajo figuron e zhdukur që nga data 4 tetor.
“Ankuesi mashkull ka informuar se që një kohë të gjatë nuk dihet vendndodhja e motrës së tij me të meta mendore. Rasti është duke u hetuar”, thuhet në raportin e PK-së.
Ndërkohë, një tjetër rast është raportuar në Rahovec, ku një baba ka lajmëruar se vajza e tij e mitur është larguar nga shtëpia më 20 nëntor dhe prej asaj dite nuk ka pasur informacione për vendndodhjen e saj.
“Ankuesi ka raportuar se vajza e tij e mitur është larguar nga shtëpia dhe nuk dihet asgjë për vendndodhjen e saj”, thuhet në raport.
Policia ka bërë të ditur se të dy rastet janë hapur dhe po hetohen.
