Një palestinez është vrarë nga forcat izraelite pranë qytetit të Xheninit, në veri të Bregut Perëndimor të pushtuar.
Sipas ushtrisë izraelite, forcat e saj hapën zjarr ndaj palestinezit pranë vendbanimit ilegal Ganim, pasi ai dyshohet se tentoi të kryente një sulm me automjet.
Ushtria izraelite tha se në incident nuk pati viktima apo të lënduar në radhët e forcave të saj.
Ndërkohë, Gjysmëhëna e Kuqe Palestineze tha se ekipet e saj mjekësore u penguan nga forcat izraelite që t’i afroheshin të plagosurit.
Në një tjetër incident, në pjesën qendrore të Bregut Perëndimor, një kolon izraelit u qëllua për vdekje pranë vendbanimit ilegal Halamish.
Sipas policisë, 30-vjeçari u dërgua në spital, por vdiq nga plagët e marra.
Ushtria izraelite tha se sulmuesi kishte qëlluar nga një automjet dhe më pas ishte larguar në këmbë.
Pas një operacioni kërkimi, forcat izraelite thanë se e gjetën të dyshuarin të plagosur në një spital, ku kishte kërkuar trajtim mjekësor, dhe e arrestuan, raporton Al Jazeera.
Pas këtyre incidenteve, kryeministri izraelit Benjamin Netanyahu tha se ka urdhëruar ushtrinë dhe agjencitë e sigurisë të shtojnë forcat në zonë, si dhe të kryejnë arrestime dhe operacione offensive në zonë.
Ai poashtu urdhëroi shembjen e shtëpisë së të dyshuarit për sulmin.
Dhuna e kolonëve izraelitë ndaj palestinezëve në Bregun Perëndimor është rritur ndjeshëm që nga nisja e luftës në Gaza, me mbi 1,330 sulme të regjistruara nga OKB-ja vetëm gjatë shtatë muajve të parë të vitit.
Grupet e të drejtave të njeriut paralajmërojnë se kolonët po përdorin gjithnjë e më shumë armë ushtarake dhe veprojnë shpesh nën mbrojtjen e forcave izraelite./teve1.info/
