Dy persona kanë pësuar lëndime dhe janë dërguar për tretman mjekësor, si pasojë e një aksidenti që ka ndodhur në Kodrën e Trimave në Prishtinë të dielën.
Zëdhënësja e Policisë së Kosovës për rajonin e Prishtinës, Flora Ahmeti, tha se aksidenti ka ndodhur rreth orës 17:00 në rrugën “Fahri Fazliu” dhe se dy persona kanë pësuar lëndime trupore.
“Sot rreth orës 17:00 në rrugën Fahri Fazliu në Prishtinë, ka ndodhur një aksident trafiku, ku kanë qenë të përfshira tri automjete. Bazuar në të dhënat fillestare si pasojë e aksidentit lëndime trupore kanë pësuar 2 persona të cilët janë dërguar për tretman mjekësor”, ka thënë Ahmeti.
Ajo tha se me rastin po merren hetuesit nga njësiti i trafikut.
