Prokuroria Themelore në Mitrovicë po interviston disa persona për incidentin në Skenderaj, ku u sulmua fizikisht Hysni Mehani, kryetar i degës së LVV-së në këtë komunë dhe zëvendësministër në detyrë i Financave.
Zëdhënësi i Prokurorisë, Valon Preteni ka konfirmuar për teve1.info, se përveç Mehanin në cilësinë e të dëmtuarit, janë duke intervistuar dy të dyshuar dhe dëshmitarë të rastit.
“Janë duke u intervistuar viktima, dëshmitarë dhe të dyshuar ne lidhje me rastin në fjalë”, ka thënë ai.
Sot gjatë ditës Mehani është sulmuar në një lokal në Skenderaj, siç ka thënë ai nga Sami Lushtaku.
Poashtu është sulmuar edhe sekretari i degës së LVV-së në këtë komunë Bahri Zbaeli.
Kryetari i Skenderajt, Sami Lushtaku pas rastit ka thënë se “qytetarët nuk i tolerojnë etiketimet ‘Sami Serbia’, prandaj kanë reaguar”.
Lëvizja Vetëvendosje duke dënuar këtë sulm të cilin e ka quajtur banditesk ka kërkuar nga organet e rendit që rasti të trajtohet me urgjencë dhe të merren masa ndaj përgjegjësve.
Rasti është dënuar edhe nga kryeministri në detyrë, Albin Kurti.
