Dy raste të vdekjes janë raportuar të enjten, më 15 tetor 2026, në rajonin e Prizrenit, të cilat Policia e Kosovës i ka regjistruar si “Hetim mbi vdekjen”.
Rasti i parë është raportuar në Prevallë, rreth orës 13:10, ku një personi i është përkeqësuar gjendja shëndetësore derisa po shëtiste me familjarët e tij.
Në vendin e ngjarjes kanë dalë ekipet përkatëse, ndërsa ekipi mjekësor ka konstatuar vdekjen e personit. Për rastin është njoftuar edhe Instituti i Mjekësisë Ligjore (IML).
Ndërkaq, rasti i dytë ka ndodhur në rrugën “Shefqet Berisha” në Prizren, ku një person i moshës madhore është gjetur pa shenja jete. Sipas Policisë, identiteti i tij ende nuk është bërë i ditur.
Me vendim të prokurorit, trupi i pajetë është dërguar në Institutin e Mjekësisë Ligjore për obduksion, me qëllim të përcaktimit të shkakut të vdekjes.
Të dy rastet janë nën hetim nga organet kompetente./teve1.info/
