Janë regjistruar dy raste të vdekjes dhe janë ofruar 326 shërbime emergjente në Qendrën Klinike Universitare të Kosovës (QKUK) brenda 24 orëve të fundit.
Numri më i madh i pacientëve të trajtuar ka qenë në Emergjencën Internistike, ndërsa numri më i vogël në Emergjencën Ortopedike.
“Nga numri i përgjithshëm i pacientëve të trajtuar, 83 raste janë menaxhuar në Reanimim, 97 në Emergjencën Internistike, 64 në Emergjencën Kirurgjike, ndërsa 55 pacientë kanë marrë trajtim në Emergjencën Ortopedike.Në Sallën e Vogël janë trajtuar 27 pacientë, kryesisht për ndërhyrje të tilla si qepja, përpunimi dhe pastrimi i plagëve”, thuhet në raportin 24-orësh të QKUK-së.
Ndërsa, numri më i madh i personave të lënduar është si pasojë e aksidenteve në trafik.
“Sa u përket lëndimeve dhe rasteve të veçanta, gjatë kësaj periudhe janë evidentuar 4 raste të personave të lënduar me armë zjarri, 1 person i lënduar me armë të ftohtë, si dhe 17 persona të lënduar si pasojë e aksidenteve në trafik”, thuhet më tej në raport.
Brenda këtyre 24 orëve janë realizuar edhe 36 pranime për trajtim të mëtejshëm në klinika të ndryshme të QKUK-së.
