Komuna e Prishtinës ka bërë të ditur se të premten në mbrëmje dy persona kanë tentuar t’i vënë zjarr shkollës “Meto Bajraktari”.
Komuna e ka dënuar këtë akt dhe ka kërkuar që organet e rendit të gjejnë të dyshuarit dhe të njëjtit të dërgohen para organeve gjyqësore.
“Mbrëmë në Shkollën ‘Meto Bajraktari’ dy persona kanë tentuar t’i vënë zjarr objektit përmes hedhjes së lëndëve djegëse. Paraprakisht ishin thyer edhe dritaret e shkollës duke dëmtuar kësisoj pronën publike”, thuhet në reagim.
Ndërkohë, thuhet se Drejtoria e Arsimit është në kontakt me Policinë e Kosovës, e cila është angazhuar për identifikimin e këtyre personave .
“Mbesim të indinjuar nga ky sulm kriminal mbi objektet shkollore si institucione të zhvillimit e mësimit për më të dashurit tanë pra fëmijët”, thuhet në njoftim.
Ndërkaq, për këtë rast është raportuar edhe në raportin ditor të PK-së, ku thuhet se dy persona kanë qenë të maskuar dhe të njëjtit janë larguar nga vendi i ngjarjes.
“Raportohet se dy persona të panjohur, të maskuar, duke thyer dritaren e objektit të shkollës, kanë hedhur lëndë djegëse-benzinë dhe kanë tentuar t’ia vunë zjarrin, por pasi janë diktuar nga personeli i shkollës të dyshuarit janë larguar në drejtim të panjohur. Është njoftuar prokurori, rasti vazhdon të hetohet”, thuhet në njoftim./teve1.info/
Prishtinë, persona të maskuar tentojnë t’i vënë zjarrin një shkolle
