Dy persona kanë mbetur të lënduar si pasojë e të shtënave me armë që kanë ndodhur në mbrëmjen e sotme në rrugën “Qamil Hoxha” në Prishtinë.
Njëri nga të lënduarit dyshohet të ketë marrë lëndime nga arma e zjarrit. Kështu ka bërë të ditur për teve1.info zëdhënësja e Policisë së Kosovës për Rajonin e Prishtinës, Flora Ahmeti.
Ahmeti ka njoftuar se personat e lënduar janë dërguar për tretman mjekësor.
“Rreth orës 20:20, policia ka marrë informatën për të shtëna me armë në rrugën Qamil Hoxha në Prishtinë. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në informacionet e para raportohet për dy persona të lënduar, njëri nga ta dyshohet të ketë marrë lëndime nga arma e zjarrit. Personat e lënduar janë dërguar për trajtim mjekësor. Hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit dhe janë në kërkim të personave të dyshuar të cilët tashmë janë identifikuar nga ana e policisë”, ka thënë Ahmeti.
