Policia e Kosovës ka njoftuar se ka identifikuar dhe shoqëruar në polici dy persona nga Komuna e Lipjanit, në lidhje me rastin e vendosjes së dy flamujve në rrethojën e kishës ortodokse në këtë komunë.
Sipas Policisë, rasti është raportuar më 10 gusht, rreth orës 21:00, nga përgjegjësi i kishës, i cili ka njoftuar se në rrethojën e objektit ishin vendosur dy flamuj – njëri me mbishkrimin “UÇK” dhe tjetri i Shqipërisë.
Njësitë relevante policore kanë ndërmarrë veprime të menjëhershme dhe kanë identifikuar e shoqëruar në Stacionin Policor në Lipjan personin me inicialet D. M.
Policia ka bërë të ditur se gjatë trajtimit nga Njësia e Hetimeve, personi ka rezultuar nën ndikimin e alkoolit, me 0.61 promilë.
Si pjesë e vazhdimit të hetimeve, më 11 gusht në polici është shoqëruar edhe personi me inicialet E. M., po ashtu nga Komuna e Lipjanit.
Ndaj tij, sipas Policisë, kanë vazhduar procedurat e mëtejshme policore.
Për rastin janë njoftuar prokurorët kujdestarë të Departamentit Special dhe Departamentit të Përgjithshëm. Me udhëzimin e tyre, rasti është proceduar me Shënim Zyrtar.
Policia e Kosovës ka theksuar se, në kuadër të Strategjisë së Integruar të Policisë së Drejtuar nga Inteligjenca dhe Policisë në Bashkësi, ka dosje të veçanta për objektet e trashëgimisë kulturore fetare, me qëllim të ofrimit të sigurisë dhe parandalimit të incidenteve.
“Nga Policia e Kosovës sigurohen 24 objekte të trashëgimisë kulturore me prezencë policore 24/7, si dhe objekte të tjera ndaj të cilave ofrohet siguri përmes njësive policore patrulluese, sipas zonave të përgjegjësisë.
Policia e Kosovës mbetet e përkushtuar në ruajtjen e rendit dhe sigurisë publike, ofrimin e sigurisë ndaj të gjithë qytetarëve pa dallim, si dhe ofrimin e sigurisë ndaj të gjitha objekteve të trashëgimisë kulturore fetare”, thuhet në njoftim./teve1.info/
