Dy persona të dyshuar për veprën penale “Deklarim i rremë” janë arrestuar të mërkurën nga Drejtoria për Hetimin e Krimeve Ekonomike dhe Korrupsionit (DHKEK), përkatësisht Njësia Rajonale për Hetimin e Krimeve Ekonomike dhe Korrupsionit në Pejë, me autorizim të Gjykatës dhe në koordinim me Prokurorin kompetent.
Sipas njoftimit të Policisë së Kosovës, gjatë hetimeve janë siguruar dëshmi të mjaftueshme se personat e dyshuar, F.SH., i lindur në vitin 2000, dhe A.K., i lindur në vitin 2005, më 13 janar 2026, pranë Qendrës për Pajisje me Dokumente të Identifikimit (QPD) në Pejë, kanë deklaruar rrejshëm duke garantuar për identitetin e saktë të personit tjetër të dyshuar, A.R., i lindur në vitin 2003.
Të dyshuarit janë intervistuar në prani të avokatëve të tyre dhe, pas intervistimit, prokurori kompetent ka nxjerrë vendim për ndalim policor ndaj dy personave të dyshuar.
“Policia e Kosovës në bashkëpunim me organet e drejtësisë mbetet e përkushtuar në luftimin e krimeve ekonomike, korrupsionit dhe çdo vepre tjetër penale, duke garantuar ligjshmëri, transparencë dhe llogaridhënie ndaj qytetarëve dhe institucioneve të Republikës së Kosovës”, theksohet në njoftim.
