Dy persona kanë pësuar lëndime të lehta si pasojë e një aksidenti trafiku që ka ndodhur mes dy veturave në qytetin e Istogut.
Rasti ka ndodhur rreth orës 13:42 në rrugën “Fehmi Agani”, ndërsa në vendin e ngjarjes kanë dalë njësitet policore për të kryer procedurat e nevojshme.
Zëdhënësi i Policisë për rajonin e Pejës, Fadil Gashi, ka konfirmuar se në aksident janë përfshirë dy automjete dhe se dy persona kanë mbetur të lënduar.
“Rreth orës 13:42, Policia në Stacionin Policor në Istog është njoftuar për një aksident trafiku në rrugën ‘Fehmi Agani’ në Istog. Dy vetura ishin të përfshira. Nga aksidenti dy persona kanë pësuar lëndime të lehta dhe janë dërguar në QKMF në Istog për tretman mjekësor”, deklaroi Gashi.
Sipas Policisë, të lënduarit kanë marrë ndihmën e nevojshme mjekësore në Qendrën Kryesore të Mjekësisë Familjare (QKMF) në Istog, ndërsa rrethanat që çuan deri te aksidenti janë duke u hetuar.
