Dy persona janë arrestuar nga Policia e Kosovës për veprën “Mashtrim”, ku të njëjtit kishin përfituar 80 mijë euro, për të siguruar kontrata të punës jashtë vendit.
Policia thotë se të dyshuarit në vazhdimësi dhe në bashkëkryerje gjatë viteve 2021 – 2022 dyshohet se kanë mashtruar persona të ndryshëm në regjionin e Ferizajt duke u kërkuar para me qellim të punësimit të tyre në Irak, Afganistan dhe Poloni.
Të dyshuarit i kanë kërkuar nga viktimat para në vlerë prej 2500 deri në 3000 euro me qellim të sigurimit të kontratës së punës në një kompani.
“Në bazë të dëshmive të siguruara deri me tani dyshohet se vlera e mashtrimit të përfituar nga të dyshuarit arrin në 80,000.00 (tetëdhjetë mije) euro”, thuhet në njoftimin e Policisë së Kosovës.
Të dyshuarit janë intervistuar në prezence të avokateve mbrojtës ku i dyshuari me iniciale N.L. me aktvendim të prokurorit është dërguar në mbajtje për 48 orë, ndërsa e dyshuara K.L. është liruar në procedurë të rregullt./teve1.info/
