Ministri në detyrë i Mbrojtjes, Ejup Maqedonci, ka bërë të ditur se investimi në zhvillimin profesional të kuadrit ushtarak vazhdon të jetë një nga prioritetet strategjike të Ministrisë së Mbrojtjes, me synim ndërtimin e një ushtrie moderne, profesionale dhe plotësisht të ndërveprueshme me aleatët.
Ai ka njoftuar se major Afrim Xhelili dhe major Besnik Thaqi kanë përfunduar me sukses Kursin e Avancuar të Komandës dhe Shtabit (Advanced Command and Staff Course – ACSC) në Akademinë e Mbrojtjes së Mbretërisë së Bashkuar, ndërsa njëkohësisht kanë fituar edhe titullin Master në Studimet e Mbrojtjes nga King’s College në Londër.
Sipas Maqedoncit, kjo arritje pasqyron nivelin e lartë profesional të kuadrit të Forcës së Sigurisë së Kosovës dhe dëshmon për përkushtimin institucional në ngritjen e kapaciteteve të FSK-së.
“Ky program prestigjioz përgatit oficerët për udhëheqje në nivel operacional dhe strategjik, planifikim të operacioneve komplekse dhe bashkëpunim me partnerët ndërkombëtarë. Pjesëmarrja e oficerëve tanë përkrah mbi 240 pjesëmarrësve nga Britania e Madhe dhe 47 shteteve të tjera është dëshmi e nivelit të lartë profesional që po arrin Forca e Sigurisë së Kosovës”, ka shkruar ai.
Në fund, ministri në detyrë uroi major Xhelilin dhe major Thaqin për suksesin e arritur, duke vlerësuar se ky është një kontribut i rëndësishëm në forcimin e kapaciteteve profesionale të FSK-së dhe në avancimin e mbrojtjes së Republikës së Kosovës./teve1.info/
