Tre shtetas britanikë, prej të cilëve dy me origjinë nga Kosova, janë vendosur në paraburgim nga Gjykata e Qarkut në Split, pasi dyshohen për përdhunimin e një 28-vjeçareje në një hotel buzë detit në këtë qytet kroat.
Sipas raportimit të mediumit publik kroat HRT, ngjarja ka ndodhur të martën në orët e hershme të mëngjesit, mes orës 05:00 dhe 07:30, në një dhomë hoteli. Viktima e ka raportuar menjëherë rastin në polici, çka ka bërë të mundur identifikimin dhe arrestimin e menjëhershëm të njërit nga të dyshuarit në vendin e ngjarjes. Dy të tjerët janë kapur më pas dhe janë dërguar në polici për hetim kriminalistik.
Gjykata ka pranuar kërkesën e prokurorisë për paraburgim njëmujor për të tre të dyshuarit, me arsyetimin se ekziston rreziku i arratisjes.
Ata akuzohen për vepër të rëndë penale kundër lirisë seksuale, e cila, sipas Kodit Penal kroat, parashikon dënim nga minimumi 6 muaj deri në 10 vjet burgim.
Hetimet lidhur me rastin janë ende në vazhdim, ndërsa autoritetet kroate nuk kanë dhënë detaje të mëtejshme për identitetin e të dyshuarve apo të viktimës, për shkak të natyrës së ndjeshme të rastit.
