Është një nga produktet e prodhuara në Kosovë.
E së fundmi po prezantohet në Poloni.
Kjo pasi atje po zhvillohet panairi ndërkombëtar i energjetikës ENERGETAB.
Në mesin e kompanive prestigjoze pjesëmarrëse janë edhe dy kompani kosovare.
Elektra nga Hani i Elezit dhe Electro Plus nga Vushtrria po prezantojnë produktet e tyre para profesionistëve të sektorit elektroenergjetik.
Elektra në panair u prezantua me kuadro dhe panele elektrike, të projektuara dhe të prodhuara në Kosovë.
Ndërkaq, Electro Plus u prezantua me transformatorë elektrikë të fuqisë, të prodhuar në Kosovë nën brendin Enerkos Transformator.
Pjesëmarrja në këtë panair për kompanitë kosovare shihet si mundësi për të krijuar kontakte të reja dhe për të zgjeruar bashkëpunimin me kompani ndërkombëtare.
Ndërsa përmes produkteve të tyre, dy kompanitë synojnë të rrisin prezencën në tregjet evropiane dhe të prezantojnë kapacitetet prodhuese të Kosovës në sektorin e energjetikës.
Ndërkohë ENERGETAB është një nga panairet ndërkombëtare të sektorit elektroenergjetik, ku marrin pjesë kompani dhe profesionistë nga vende të ndryshme.
