Dy komisione të Kuvendit të Kosovës, Komisioni për Buxhet, Punë dhe Transfere dhe Komisioni për Integrime Evropiane, do të mbajnë sot mbledhjet e para pas formimit të tyre.
Sipas njoftimit zyrtar, Komisioni për Buxhet, Punë dhe Transfere do të diskutojë në rend dite Projektligjin mbi ndarjet buxhetore për Buxhetin e Republikës së Kosovës për vitin 2026, si dhe katër marrëveshje ndërkombëtare.
Mbledhja është planifikuar për në orën 12:00.
Në këtë mbledhje do të shqyrtohen projektligji për ratifikimin e marrëveshjes së financimit për programin e parë të “politika zhvillimore për efektivitet fiskal, konkurrueshmëri dhe rritje të gjelbër” ndërmjet Kosovës dhe Asociacionit Ndërkombëtar për Zhvillim; Projektligji për ratifikimin e marrëveshjes së kredisë për projektin “KOMPAS” – për forcimin e sistemit të shëndetësisë; Projektligji për marrëveshjen e kredisë për projektin “Edukimi në fëmijërinë e hershme dhe kujdesi për kapitalin njerëzor të Kosovës”; Projektligji për ratifikimin e marrëveshjes së kredisë “Instrumenti për reforma dhe rritje për Ballkanin Perëndimor”, ndërmjet Bashkimit Evropian dhe Kosovës.
Ndërsa Komisioni për Integrime Evropiane do të mblidhet në orën 11:30 për të shqyrtuar Projektligjin për ratifikimin e “Marrëveshjes ndërmjet Kosovës dhe Bashkimit Evropian për zbatimin e përkrahjes së Unionit për Kosovën në kuadër të Instrumentit për reforma dhe rritje”.
