Bashkë ishin në luftë si ushtarë të Ushtrisë Çlirimtare të Kosovë.
E bashkë u paraqitën edhe të martën në gjykatore.
Abit Mustafa dhe Rrahim Tahiri, dëshmuan për tmerret e luftës në fshatrat e Vushtrrisë.
Në gjyqin ndaj Zoran Kostiq dhe Dragan Miloviq, u dëshmua se si ishte vrarë një fëmijë rrugës për në shkollë.
“Ne e kemi pasë një nxënës, i cili është vrarë më 22 shtator. Ai ishte rrugës duke ardhë në shkollë, kur kanë filluar bombardimet dhe ai gjatë rrugës për në shkollë është vrarë. Është vrarë nga forcat serbe”, ka thënë Mustafa.
Torturave e keqtrajtimeve, sipas dëshmitarit Tahiri, nuk i kishin shpëtuar asnjë shtëpi.
“Nuk ka familje, nuk ka shtëpi, pa u kon dy ose tre që i kanë marrë në fshatin Prolluzhë, ku ka qenë stacioni policor. Iu kërkojshin armatim, sa me i shti me i rreh. Kemi edhe tre persona që si pasojë e keqtrajtimeve në këtë stacion që edhe kanë vdekë prej qatij dajaku”, ka thënë Tahiri.
Përkundër vrasjeve, dëme të shumta u ishin shkaktuar edhe shtëpive e hambarëve të banorëve të fshatrave të Vushtrrisë.
“Jo vetëm fshati Strofc, por edhe fshatrat përreth, asnjë kulm nuk ka mbetë nëpër shtëpië, të gjitha kanë qenë të shkatërruara. Përveç shtëpive, janë vrarë të gjitha shtazët shtëpiake, janë djegë hambarët me grurë.”, është shprehur tutje Mustafa.
Tahiri, tregon se në krye të këtyre vemeve e kishin identifikuar Zoran Kostiq.
“Gjatë qatij vëzhgimi unë e kam njoft Zoranin, që është duke u përgatitë me popullatë, duke i rë popullatës, edhe çdo krim, çdo sen që është bërë në pesë fshatra, Zorani nuk ka vend që s’ka marrë pjesë.”, ka theksuar tutje Tahiri
Para trupit gjykues, u dëshmua edhe veshja e Kostiq që kishte mbajtur gjatë luftës.
“Setrën e ka pasë të ushtrisë, e poshtë ka qenë civil. Gjithmonë kanë thanë se udhëheqës i asaj fushate, ka qenë Zoran Kostiq.”, ka përfunduar Mustafa.
Kostiq e Miloviq, akuzohen se gjatë luftës si pjesëtarë të policisë serbe, kishin vrarë, maltretuar, plaçkitur e shkatërruar shtëpitë nëpër fshatrat e komunës së Vushtrrisë.
