Ahurin e pa të zbrazët mëngjesin e së dielës.
Katër viçat që Shaban Troshupa i mbante tash e mbi gjashtë muaj, dikush ia kishte vjedhur në fshatin Breg i Zi të Lipjanit.
Menjëherë, i zoti i shtëpisë thirri policinë, e bashkë bënë kërkimet e gjurmëve të bagëtive.
“Dalja ka qenë këtu. Se i kanë marrë edhe kanë vazhdu qeshtu drejt e n’kallamoq aty, aty dihet n’kallamoq shenjat ku kanë ecë, që kanë ba lëvizje, kanë thy do tramak, diku pak ma rrallë po u dishin që qatje kanë dalë”, shprehet Shaban Troshupa.
Por ky nuk është rasti i vetëm i vjedhjes së bagëtive.
Në Bujanë të Lipjanit, fshatin ngjitur Bregut të Zi, ditët e fundit ndodhën dy vjedhje tjera.
E Sabrie Buja e përjetoi rëndë vjedhjen e lopës dhe viçit që mbanin, pasi i kishte marrë nga i vëllai.
“Ma pruni lopën, s’u bënë dhjetë ditë, u shtu lopa, të enjten i bëjke tri javë, të martën ma morën. Veç Zoti është i madh, për borxh s’ma ka marrë kërkush, veç për qejf”, shprehet ajo.
Ndërsa vetëm vlera e lopës së vjedhur sipas bashkëshortit të Sabries, Sabit Bujës ishte mijëra euro.
“Për vlerë të tregut ato nër 4 mijë euro s’ke mujt me marrë atë lopë. Ajo ish kanë diçka e veçantë”, thotë Sabit Buja.
Kurse Bedrie Buja, e cila mban biznesin e saj me bagëti, tashmë është në dyshim për ta zgjeruar atë, shkak i këtyre vjedhjeve.
“Nuk janë tu u gjend kërkun, janë duke u ba vjedhje thuajse çdo ditë. Unë ndoshta duhet me mbyllë biznesin për shkak të pasigurisë. Se në qoftë se fitimin tem e marrin hajnat, na nuk di çka kena me ba”, thotë ajo.
Tëvë1 ka kërkuar të dijë nga Policia e Kosovës se deri ku ka mbërritur pista e hetimit dhe a po dyshohet për persona të njëjtë që po kryejnë këto vjedhje, mirëpo deri në publikimin e kronikës të njëjtët nuk kanë kthyer përgjigje.
