Policia e Kosovës ka bërë të ditur se dy aksidente me fatalitet janë raportuar gjatë së dielës në Kosovë.
Njëri raportohet të ketë ndodhur gjatë mbrëmjes të së shtunës në rrugën Prishtinë – Fushë-Kosovë, ndërsa tjetri të dielën në lagjen “Kolonia e Re” në Mitrovicë.
Në raportin 24-orësh të Policisë thuhet se njëri prej shoferëve të pesë automjeteve të përfshira në aksidentin në rrugën Prishtinë – Fushë-Kosovë nuk ka arritur t’u bëjë ballë plagëve të marra dhe ka vdekur në Qendrën Klinike Universitare të Kosovës.
Trupi i pajetë i viktimës, me urdhër të prokurorit, është dërguar në Institutin e Mjekësisë Ligjore për obduksion.
Ndërsa, aksidenti i ndodhur gjatë pasdites të së dielës në Mitrovicë, thuhet se ka ndodhur mes dy veturave dhe një motoçiklete.
Si pasojë e plagëve të rënda, motoçiklisti thuhet se ka vdekur në vendin e ngjarjes.
Me vendim të prokurorit trupi i pa jetë është dërguar në Institutin e Mjekësisë Ligjore për obduksion, ndërsa i dyshuari është arrestuat dhe me vendim të prokurorit është dërguar në mbajtje.
Ndërkaq, në raport është bërë e ditur se kanë ndodhur edhe 23 aksidente të tjera me persona të lënduar./teve1.info/
