Ai tha se Drejtoria e Inspeksionit në fakt është njëra nga drejtoritë më të rëndësishme në komunë, mirëpo shtoi se këtë drejtori e kanë gjetur totalisht të fjetur.
“Drejtoria e Inspeksionit është njëra prej drejtorive më të rëndësishme në Komunën e Prishtinës, një drejtori për të cilën mund të ju them që e kemi gjetur totalisht të fjetur, prandaj me të gjitha sektoret e saj tashmë jemi duke bërë punë të jashtëzakonshme, në radhë të parë të përgjigjeve ndaj ankesave të qytetarëve. Por megjithatë ne duhet akoma të rrisim dhe të shtojmë kapacitetin, sidomos kur është fjala për një qytet si Prishtina me numër kaq të madh të banorëve, dhe një qytet i cili në katër anët e tij po ndërtohet në vazhdimësi, prandaj konsiderojmë që kjo pjesë e komunikimit do të thoja funksional dhe profesional të drejtorisë së inspeksionit, si dhe me bizneset në Prishtinë, do të arrijmë të zhvillojmë tutje edhe më shumë”, deklaroi Dushi.
Ndërsa në lidhje me çështjen e parkingut, ai tha se ka vërejtje të qytetarëve rreth implementimit të projektit të “Prishtina Parking”.
“Unë mund të ju informoj që edhe ne si drejtori e inspeksionit, por edhe vet Rama ka udhëhequr këto ditë takimin e grupit punues, i cili ka për obligim që të shqyrtojë, të rishqyrtojë këtë rregullore, dhe të bëjë ndryshimet e duhura dhe plotësimet e duhura. Megjithatë unë konsideroj që “Prishtina Parking”, është një projekt i cili i duhet qytetit të Prishtinës, dhe do të lehtësojë përgjithsisht edhe aspektet që ndërlidhen me parkingun, dhe aspektet tjera që ndërlidhen me lehtësimin e qarkullimit në komunikacion. Po ashtu ka edhe dy apo tre raste të cilat ne si drejtori e inspeksionit kemi pezulluar punën e “Prishtina Parking”, sepse nuk i kanë përmbushur në tërësi ato qfarë rregullorja e Komunës së Prishtinës kërkon”, shtoi Dushi.
