Ushtruesi i detyrës së ministrit të Infrastrukturës, Hysen Durmishi, ka bërë të ditur se institucionet e Kosovës kanë nisur inspektime të përbashkëta lidhur me importimin, tregtimin dhe përdorimin e kimikateve, biocideve dhe pesticideve.
Durmishi deklaroi se gjatë kontrolleve është konstatuar keqpërdorim i sistemit të regjistrimit nga disa operatorë, të cilët kanë paraqitur pesticide si biocide, përfshirë edhe substanca të ndaluara nga direktivat ndërkombëtare.
“Si Ministër dhe si Qeveri kemi politikë zero tolerancë ndaj çdo veprimi që rrezikon shëndetin e qytetarëve dhe mjedisin. Jeta dhe shëndeti publik janë mbi çdo interes tjetër”, tha ai, duke theksuar se masat tashmë janë ndërmarrë pa vonesë.
Sipas Ministrisë, deri tani janë ndërmarrë këto veprime konkrete:
Inicimi i auditimit të brendshëm për mbi 100 lëndë;
Ndalimi i importit, shpërndarjes dhe përdorimit të substancave të rrezikshme;
Forcimi i inspektimeve në terren dhe koordinimi ndërinstitucional për zbatim të ligjit;
Ndëshkimi i çdo shkelësi pa përjashtim;
Formulimi i akteve dhe rregulloreve të reja për kontroll më të mirë;
Shfuqizimi i lejeve të importit që ishin në kundërshtim me ligjin;
Konfiskimi i një sasie të konsiderueshme të kimikateve për të parandaluar daljen e tyre në treg.
Durmishi bëri thirrje që institucionet e rendit dhe të drejtësisë të veprojnë me prioritet dhe seriozitet, duke theksuar se askush nuk është mbi ligjin dhe asnjë praktikë që rrezikon njerëzit, kafshët apo mjedisin nuk do të tolerohet.
