Ushtruesi i detyrës së ministrit të Infrastrukturës dhe Mjedisit, Hysen Durmishi, ka deklaruar se gjatë mandatit të Qeverisë Kurti janë realizuar mbi 300 projekte infrastrukturore në të gjithë vendin.
Durmishi deklaron se deri më tani janë përfunduar rreth 700 kilometra rrugë, ndërsa edhe 870 kilometra të tjera janë në proces ndërtimi.
Ai ka bërë të ditur se rreth 50 për qind e projekteve në realizim janë drejt përfundimit, ndërsa pjesa tjetër ndodhen në faza të ndryshme të implementimit.
“Ne i kemi realizuar mbi 300 projekte gjatë këtij mandati. 700 km rrugë i kemi përfunduar tashmë. 870 km rrugë janë në realizim e sipër, ku 50 për qind prej tyre janë në përfundim, pjesa tjetër disa janë në mes të projekteve”, deklaroi ai në emisionin “Këndi i Debatit” në Tëvë1.
Ai ka shtuar se infrastruktura nuk ka qenë prioritet kryesor i Qeverisë, pasi fokusi ka qenë edhe në fusha të tjera.
“Infrastrukturën nuk e kemi pasur prioritet si Qeveri – nuk e kemi pasur ndër top prioritetet kryesore, sepse premtime kemi pasur. Kemi pasur prioritete tjera si Qeveri e Kosovës. Por, në infrastrukturë kemi punuar shumë. Janë plot projekte që i kemi gjetur në gjendje shumë të keqe, disa i kemi përfunduar e disa jemi në përfundim e sipër”, tha Durmishi.
Ai tha se nuk ka komunë në Kosovë që Qeveria Kurti nuk ka punuar. /teve1.info/
