Anëtari i Lëvizjes Vetëvendosje, Hysen Durmishi, ka kritikuar opozitën për qasjen e saj ndaj formimit të institucioneve, duke thënë se ajo duhet të vendosë nëse dëshiron krijimin e institucioneve apo shkuarjen në zgjedhje.
Durmishi ka deklaruar se pa një marrëveshje për çështjen e presidentit, institucionet e tjera mund të formohen me qëllim që vendi të shkojë më pas në zgjedhje.
Sipas tij, një nga akuzat kryesore të opozitës është se tri pozitat kryesore shtetërore nuk duhet të përfundojnë në duart e mazhorancës.
“Ejani pra t’i bëjmë institucionet, ejani të bëjmë marrëveshje”, ka thënë Durmishi, duke përmendur ofertën për opozitën, e cila sipas tij përfshin pozitën e kryetarit të Kuvendit, pjesëmarrje në resore qeverisëse dhe një president konsensual.
“Ofertë më gjeneroze se kaq, me numrat që i keni, nuk mund të ju ofrohet”, është shprehur ai.
Durmishi ka akuzuar opozitën se problemi i saj nuk është formimi i institucioneve, por kryeministri Albin Kurti.
“Ju nuk brengoseni për formimin e institucioneve, ju e keni problem kryeministrin Kurti. Pra ju nuk po mund ta kapërdini rezultatin zgjedhor dhe përkrahjen masive që kryeministri e ka në popull”, ka deklaruar Durmishi.
Në fund, ai ka thënë se nëse opozita dëshiron zgjedhje të reja, nuk mund të jetë ajo që përcakton datën e tyre.
“E nëse ju dëshironi me patjetër të shkojmë në zgjedhje, atëherë na falni, por nuk mundeni ju që ta caktoni datën e zgjedhjeve. Koncentrohuni, më mirë ju del!”, ka përfunduar Durmishi./teve1.info/
