Zëvendësministri, Hysen Durmishi, ka reaguar ndaj deklaratës së deputetit të PDK-së, Hysen Berisha, i cili sot ka thënë se kryeministri i vendit, Albin Kurti, ka gënjyer që po punohet në rrugën Prishtinë-Podujevë.
Durmishi ka bërë të ditur se Operatorët Ekonomik të angazhuar në përfundimin e kësaj rruge, tanimë kanë filluar të punojnë edhe natën, derisa ka shtuar që Berisha ka pritur të ndalen ekskavatorët për të bërë foto.
Në sqarim, Durmishi ka përmendur se pikërisht mbrëmë në vizitën e Berishës, është punuar deri në mesnatë, teksa ka treguar edhe oraret e punimeve, përcjell teve1.info.
“Sqarim për opinionin publik dhe deputetin Hisen Berisha. Operatorët Ekonomik të angazhuar në rrugën Prishtinë-Podujevë kanë filluar që të punojnë edhe natën për shkak të temperaturave të larta dhe për shkak të ngarkesës së madhe në komunikacion që është ditën. Natyrisht që ne kemi dalur për t’i vizituar dhe për t’i falënderuar dhe ofruar mbështetje për përkushtimin e tyre që punimet të kryhen me kohë. Sa për informimin e të gjithëve edhe mbrëmë është punuar deri në mesnatë. në llot 0, është punuar deri në ora 24:00, në llot 1, është punuar deri në ora 24:00, në llot 2, është punuar deri në ora 23:30, në llot 3 është punuar deri në ora 21:00. Është e vërtetë z. Berisha se “Rrena i ka këmbët e shkurta”. Paskeni pritur deri sa janë ndalur eskavatorët sa për t’i bërë disa foto. Më pastaj në komente i paske publikuar disa video që janë reklamë e mirë për ne sepse ato tregojnë sinjalistikën në nivel e sigurinë maksimale në punishte, kështu që faleminderit për ato video të postuara. Dil më shpesh të lutem! ”, ka shkruar Durmishi në Facebook.
Më tej, Durmishi ka shkruar se do të punojnë ditën dhe natën që ky projekt i nisur të përfundojë para afatit.
“Do të punojmë natën sa herë që ka nevojë dhe në ato pozicione ku mund të punohet. Natyrisht që nuk mund të punojmë pas mesnatës në vendbanime, afër shtëpive, sepse zhurma e ekskavatorëve e dridhjet e rugëve janë pengesë për qytetarët në ato orë të vona”, ka përfunduar Durmishi./teve1.info/.
Berisha viziton punimet e natës në rrugën Prishtinë – Podujevë: Askush nuk po punon
