Kandidati për deputet i Lëvizjes Vetëvendosje, Ali Dula , ka deklaruar se Qeveria Kurti 2 ka arritur të përmbushë pjesën më të madhe të premtimeve të saj.
Në emisionin “Ditari” në Tëvë1, Dula tha se Qeveria Kurti 3, e cila pritet të formohet pas 28 dhjetorit, do të ketë prioritet investimet në sigurinë e vendit dhe forcimin e ushtrisë.
Ai shtoi se rrethanat ndërkombëtare dhe kërcënimet nga Rusia, si dhe mobilizimet ushtarake të disa vendeve evropiane, e bëjnë këtë prioritet të domosdoshëm.
“Sot e kemi një qeveri e cila ka arritur që në pjesën më të madhe t’i përmbush premtimet e saj. Qeveria Kurti 3, e cila pritet të krijohet pas 28 dhjetorit, është jashtëzakonisht e rëndësishme, sepse synon investime veçanërisht në sigurinë e vendit. Rrethanat aktuale na detyrojnë që investimet të përqendrohen në mbrojtjen e Kosovës, duke pasur parasysh kërcënimet dhe rreziqet që vijnë nga Rusia, si dhe armatosjen dhe mobilizimin e vendeve të ndryshme evropiane. Qeveria e Kosovës tashmë ka ndarë mbi 1 miliard euro për forcimin e ushtrisë. Investimet kanë filluar dhe janë duke u zbatuar, duke përfshirë dy lloje dronësh, pajisje tokësore dhe ajrore, si dhe një marrëveshje me SHBA-të për helikopterë, që do të rrisin kapacitetet e sigurisë së vendit”, tha Dula.
Ai gjithashtu nënvizoi rëndësinë e skemave sociale dhe kontaktit të qeverisë me qytetarët, duke theksuar se këto iniciativa do të vazhdojnë të jenë pjesë e fokusit edhe në mandatin e ardhshëm.
