Në Tuz, komunë e banuar me shumicë shqiptare në afërsi të Podgoricës, para dy ditësh janë mbajtur zgjedhjet lokale, ku ka fituar koalicioni i partive shqiptare, Forumi Shqiptar.
Në këto zgjedhje mori pjesë edhe koalicioni tjetër shqiptar “Bashkë”. Ndonëse nuk morën votat e mjaftueshme për të qenë pjesë e asamblesë komunale të Tuzit, anëtari i listës së këtij koalicioni, Kristian Dukaj thotë se me rëndësi është shqiptarët do ta udhëheqin këtë komunë për katër vitet e ardhshme.
Ai bën të ditur se procesi ka qenë i qetë, teksa pjesëmarrja e votuesve ka qenë e lartë.
“Pjesëmarrja ka qenë e lartë, shumë më e lartë sesa para 4 viteve. Kemi pasë dalje të madhe të qytetarëve nga 12 mijë e 300 veta që kanë të drejtë vote, kanë dalur përafarësisht 8 mijë e 200. Kështu që pjesëmarrja ka qenë e lartë. Ajo që është kryesore është që shqiptarët do ta udhëheqin komunën e Tuzit edhe për katër vitet e ardhshme”, deklaroi ai në “Info Nata” në Tëvë 1.
Ajo çfarë e gëzon Dukajn është fakti “se kanë depërtuar në çdo vend të komunës së Tuzit”.
“Për dallim nga koalicionet tjera, ne kemi qenë koalicioni i dytë shqiptar në komunën e Tuzit. Kemi qenë shumë afër pragut që të hyjmë në parlamentin lokal në komunën e Tuzit. Por ajo që mua si pjesëtar i koalicionit shqiptar ‘Bashkë’ më kënaq shumë është fakti që në çdo vendvotim ne kemi arritur të marrim vota, ideja dhe programi jonë ka shkuar tek çdo banor, në çdo vend të Malësisë. Dhe besoj që ky është një fillimi i ndryshimit të politikës, e sidomos të politikës së re, të cilën ne edhe e kemi treguar gjatë gjithë kësaj kohe…ajo që mua më gëzon fakti është se kemi depërtuar në çdo vend të komunës së Tuzit”, theksoi ai.
Në koalicionin “Forumi shqiptar” të udhëhequr nga Alternativa Shqiptare e kryetarit aktual të komunës së Tuzit, Nik Gjeloshaj, bëjnë pjesë edhe Lidhja Demokratike e Shqiptarëve, Unioni Kombëtar Shqiptar dhe Lidhja Demokratike në Mal të Zi.
Ky koalicion ka arritur të sigurojë 18 mandate në Kuvendin e Komunës së Tuzit, ose shumicën absolute. /Teve1.info/