Skuadra e Dukagjinit është kthyer te fitorja në Superligën e Kosovës në futboll, pasi në xhiron e 24-të ka triumfuar në udhëtim ndaj Malishevës.
Në ndeshjen e luajtur të mërkurën në stadiumin “Liman Gegaj” në Malishevë, Dukagjini triumfoi me shifrat 2:1. Kjo është fitorja e parë për ekipin nga Klina pas një serie prej tri humbjeve dhe një barazimi.
Ukrainasi Vladyslav Khomutov e kaloi Dukagjinin në fund të pjesës së parë. Ai shënoi në minutën e parë të kohës shtesë pas asistimit të brazilianit Marclei Cesar.
Malisheva u kundërpërgjigj duke barazuar shifrat me të filluar pjesa e dytë, saktësisht në minutën e 48-të nëpërmjet Faruk Bihoraqit, përpara se ta pranojë edhe golin e dytë.
Dukagjinit fitoren ia siguroi braziliani Santos, i cili shënoi me kokë pas harkimit të Khomutovit, ndërsa goli i tij u konfirmua edhe nga sistemi VAR pasi kishte dyshime për pozitë jashtë loje.
Me këtë fitore, Dukagjini ka tubuar 29 pikë, katër më shumë se Malisheva.