Deputeti i Lëvizjes Vetëvendosje, Enver Dugolli ka deklaruar se Kuvendi i Kosovës është tashmë i konstituuar dhe në ditët në vijim pritet të trajtohen pikat e tjera të rendit të ditës, përfshirë edhe tentimin për formimin e Qeverisë së re.
Ai ka hedhur poshtë akuzat se Vetëvendosje po e zvarrit këtë proces, duke theksuar se nuk ka pasur asnjë prolongim nga ana e partisë së tij.
“Gjithë kjo që ka ndodhur në Kuvendin e Kosovës padrejtësisht është atakuar dhe është sulmuar LVV se po e prolongon procesin. Ne nuk e kemi prolonguar në asnjë rrethanë e asnjë mënyrë”, ka deklaruar Dugolli në emisionin “Ditari” në Tëvë1.
Ai ka kritikuar opozitën për mungesë reflektimi dhe për abstenimin gjatë votimit të Nenad Rashiqit si nënkryetar të Kuvendit, duke e cilësuar këtë veprim si të pakuptimtë.
“Nuk ka as shkelje procedurale, as shkelje ligjore e as kushtetuese në zgjedhjen e Rashiqit. Ne nuk jemi ata që duam të bllokojmë formimin e institucioneve”, shtoi ai.
Sipas Dugollit, LVV është e gatshme të procedojë me propozimin e mandatarit për formimin e Qeverisë te Presidentja, dhe më pas do të shihet nëse partitë politike do ta mbështesin Qeverinë Kurti 3, apo vendi do të përballet me zgjedhje të jashtëzakonshme./teve1.info/
