Ish-deputeti i Lëvizjes Vetëvendosje, Enver Dugolli ka thënë se kjo parti do të ketë rezultat më të lartë në zgjedhjet e 7 qershorit nga ai i 28 dhjetorit.
Ai ka thënë se lista e kandidatëve për deputetë të kësaj partie është garantuese për këtë.
Një arsye tjetër që Dugolli pret “fitore të madhe” sipas tij është se qytetarët e kanë kuptuar se kriza e krijuar është bërë për të ndaluar siç ka thënë ai qeverisjen e mirë të LVV-së.
“Lista jashtëzakonisht e mirë e cila është edhe premtuese dhe garanci e një fitore të madhe që na pret më 7 qershor. Përveç që do të jetë rikonfirmimi i rezultatit të 28 dhjetorit, unë pres që do të kemi edhe më shumë mandate, sepse qytetari si asnjëherë më parë po e kupton që ngërçi që ka ndodhur për me ja shkurtu mandatit Qeverisë Kurti III, ka qenë i padrejtë i panevojshmesh dhe si rezultat i kësaj na presim referendum nga qytetarët për të vazhduar punët e mira dhe gjetur një kandidat konsensual për presidentin”, ka thënë ai në emisionin “InfoNata” në Tëvë1.
Ai ka folur edhe kthimin e Osmani në LDK, që sipas Dugollit ajo është kthyer për ambicie personale.
Dugolli ka thënë se binomi Abdixhiku-Osmani janë “binomi i shpëtimit të njëri – tjetrit”.
“Osmani u kthye aty ku ata janë mbyllën dyert, ku nuk ishte e mirëpritur. Nuk e di kur LDK u bë parti e mirë, ndërsa LVV u bë e keqe e cila ja hapi dyert dhe e bëri presidente. Kauzat politike duhet të jenë të sinqerta, nëse fillojmë dhe i reduktojmë ato në ambicie personale, unë besoj se qytetari nuk besoj se do të ketë atë mbështetje dhe entuziazëm për kë do”, ka thënë Dugolli.
Ai ka thënë se ish-deputetët nga Grupi Parlamentar i LVV-së që u larguan dhe ju bashkuan Osmanit, si Haxhi Avdyli, Jeta Statovci e Albena Reshitaj, kanë marrë vota në këtë koalicion, por sipas tij nuk do të votohen ashtu si kandidatë të LDK-së.
