Minatorët po presin Shqiponjat në ndeshjen e tretë finale të Superligës së basketbollit vendorë.
Atmosfera pritet të jetë e jashtëzakonshme, ashtu sic ka qenë në përballjet që janë zhvilluar në Minatori dhe Karragaqi këtë edicion, sidomos në garat shtesë.
Trepça dhe Peja ndeshen me skuadrat që synojnë të kalojnë në epërsi 2:1, që do të ishte një hap I madh për të dy taboret.
Ndeshjen e parë e fituan mitrovicasit 94:86, kurse pejanët u kundërpërgjigjën “ashpër” në takimin e dytë 107:79, duke shënuar njërën nga fitoret më bindëse në këtë edicion, e kjo pikërisht erdhi në finalen e dytë.
Klubi mitrovicas vetëm një ditë para ndeshjes mori një vendim tejet interesant, se me marrëveshje të dyanshme ka ndërprerë bashkëpunimin me trajnerin Engin Gençoglu.
Skuadrën deri në fund të plejofit do ta drejton legjenda e basketbollit mitrovicas, Ilir Selmani, që deri më tani ishte në shtabin teknik.
Përballjet mes këtyre dy skuadrave kanë qenë gjithmonë interesante dhe kështu pritet edhe sonte.
‘Xehetarët’ për të depërtuar në finale eliminuan Bashkimin dhe Sigal Prishtinën, ndërsa Peja fitoi duelin verdhezi kundër kampionit aktual, Golden Eagle Yllit.
Trepça për herë të fundit ishte shpallur kampione më 2012, ndërsa Peja më 2013. Mitrovicasit fituan Kupën e këtij edicioni, ndërsa pejanët ishin finalistë të Ligës Ballkanike ku u kurorzuan me medalje të argjendtë.
Super dueli fillon me nga ora 20:00.
