Me sy kah revanshi dhe me shpresë te përkrahja e madhe e tifozëve, Kombëtarja e Kosovës në basketboll synon të rikthejë fitoret por edhe gjasat në parakualifikimet e Botërorit 2027.
Basketbollistët më të mirë të vendit, nga e diela janë në përgatitje për dy ndeshjet e radhës, të fazës së parë, parakualifikuese kundër Azerbajxhanit dhe Zvicrës, në kuadër të Grupit A.
Këto dy duele, “Dardanët” do t’i zhvillojnë në Pallatin e Sportit në Prishtinë, dhe që të dyja nisin nga ora 19:30.
Pas katër xhirove, Kosova zë vendin e fundit në grup me pesë pikë, sa ka edhe Azerbajxhani në vendin e tretë.
Me tetë pikë grupit i prinë Zvicra, ndërsa Irlanda ka gjashtë pikë në vendin e dytë.
Një ditë para përballjes me Azerbajxhanin, përzgjedhësi francez Jean-Denys Choulet ka kërkuar përkrahje nga tifozët, por angazhim të madh nga basketbollistët
“Nuk jam hiq i kënaqur me mënyrën se si po luajmë aktualisht, por po shpresojë që kjo do të përmirësohet deri në momentin e ndeshjeve. Jam këtu për të sjellë fitore, dhe duhet ta fusim në kokë mendësinë e fitores, por nuk do të jetë e lehtë aspak, pasi kemi pasur pak ditë për përgatitje dhe për përmirësim nga ndeshjet e fundit, por shpresoj e besoj në fitore”, ka thënë Choulet.
Nga tri grupet e këtij raundi parakualifikues, tutje avancojnë fituesit dhe po ashtu kombëtarja më e mirë e vendit të dytë, prej tri grupeve.
Kosovës i janë kthyer katër basketbollistë pas mungesës në grumbullimin e kaluar. Janë kthyer Divine Myles, Drilon Hajrizi, Valon Bunjaku dhe Musab Mala, të cilët munguan për shkak të lëndimeve.
Basketbollistët e Kosovës janë kritikuar për paraqitje të dobët në ndeshjet e kaluara.
Kapiteni Dardan Berisha dhe basketbollisti Dardan Kapiti bazohen në përvojën e ekipit por edhe në përkrahjen e tifozëve.
Tre ditë pas ndeshje me Azerbajxhanin, Kosova e pret edhe Zvicrën. “Dardanët” kanë vetëm një fitore, kundër Irlandës në shkurt të vitit të kaluar, derisa u mposhtën më pas në tri duelet e radhës.
